रांजण

कोकणच्या मेव्यातील अजून एक फळ म्हणजे रांजण. पिवळेधम्मक छोटेसे रांजण खायची मजा काही औरच. आपल्या बोटाच्या पेरापेक्षा छोटे असलेले फळ अलिबागमध्ये फक्त एप्रिल मे महिन्यात मिळते. अलिबाग परिसरातील जंगलांमध्ये खास करून उन्हाळ्यामध्ये सापडणारे छोटेसे फळ. मार्च एप्रिल महिना सुरु झाला कि परिसरातील डोंगराळ भागात राहणारे आदिवासी, कातकरी लोक टोपलीमध्ये  रांजणे घेऊन अलिबागमध्ये विकायला हमखास येतात. एक छोटासा स्टील चा पेला किंवा त्याच आकाराची प्लास्टिक ची डबी भरून रांजणे  साधारणतः १० ते २० रुपयाला मिळते. आणि सर्व अलिबागकर अगदी आवडीने रांजणे विकत घेऊन खातात. पण पैशापेक्षा जास्त, न मोजता येणारा आनंद, हा अलिबागचा मेवा खाण्यात असतो.

रांजण गर्द पिवळे झाले कि पिकले असे समजावे, नाहीतर थोड्या कच्या रांजणाचा चीक तोंडाला लागलाच म्हणून समजा.  अशा ह्या छोट्याशा फळामध्ये फार मोठे औषधी गुण आहेत.  रांजण हे प्रोटीन, कार्बोदके, व्हिटॅमिन सी व ए चे उत्तम स्रोत आहे

शास्त्रीय नाव – Manilkara Hexandra

औषधी गुणधर्म – अँटी ऑक्सिडेन्ट

• ताप आणि कावीळ बरे करते
• मूत्रपिंडाचे कार्य सुधारते
• त्वचेचे रोग बरे करते
• रोगप्रतिकारशक्ती वाढवते
• हार्मोनल असंतुलन सुधारते
• सुजलेल्या हिरड्या बरे करते
• फुफ्फुसांचे कार्य सुधारते

तर मंडळी उन्हाळ्यामध्ये अलिबागला ह्या फळाची चव नक्की घ्या आणि भरपूर खा. फक्त रांजण खाल्ल्यावर लगेच पाणी पिणे टाळावे.